Candieira

Candieira afronta a súa recta final e prepara un gran encontro de mulleres do mar para outubro

Un ano despois da posta en marcha da Rede de apoio e promoción das mulleres do mar Candieira, facemos repaso daquelas iniciativas que, ao longo das distintas fases, foron dando pasos ata inicios de agosto. Máis de cen mulleres do mar de toda Galicia tiveron a oportunidade de achegarse á xestión e organización dunha iniciativa empresarial a través do programa EMBARCA, pero tamén avanzaron no reto de asociarse e traballar en rede, dentro do programa ALIADAS.

As redeiras de Malpica ensaian unha ruta guiada de turismo mariñeiro para cen visitantes

As redeiras O Fieital de Malpica serán as encargadas de dirixir a visita coa que queren dar a coñecer o seu oficio. Na tarde deste venres 3 de agosto recibirán no peirao da vila un cento de visitantes. A experiencia servirá para probar o percorrido máis o relato ideado por elas mesmas no marco do programa EMBARCA de Candieira, un proxecto de cooperación posto en marcha o pasado ano por seis Grupos de Acción Local do Sector Pesqueiro.

EMBARCADE, turismo mariñeiro na ría de Vigo (II)

Se hai unha semana as maricadoras de Arcade improvisaron dende a beira do mar a ruta de turismo mariñeiro que deseñaron para dar a coñecer o seu oficio, poñer en valor o seu traballo e ofrecerlle ao público unha panorámica do marisqueo nese recanto da ría de Vigo, desta volta subiron a bordo do 'Arcade Dos' para ensaiar o seu discurso nos bancos de cultivo, no medio e medio da ría de Vigo.

De ruta coas mariscadoras de Camariñas

Son mariscadoras e mariñeiras. As mulleres do mar de Camariñas viven e traballan na Costa da Morte coa mesma paixón coa que contan os detalles do seu oficio. Acompañadas polas redeiras de Malpica percorreron algúns dos escenarios que pisan a diario: o paseo, o peirao, a lonxa e o banco de Ariño. Dúas horas de visita guiada para a primeiro ensaio de turismo mariñeiro de Candieira no GALP Costa da Morte.

Encontro da Asociación de Mulleres da Costa Sostible en Corcubión

Mariscadoras da Ría de Muros-Noia visitaron este xoves as súas colegas do norte co fin de dar a coñecer a Asociación de Mulleres do Sector Pesqueiro Seo de Fisterra-Ría de Muros-Noia, da que forman parte, e alentalas a integrarse neste novo espazo de intercambio e toma de decisións. O colectivo busca reforzar o papel das mariscadoras, mariñeiras, armadoras, redeiras e percebeiras da Costa Sostible dentro e fóra do seu ámbito de traballo.

EMBARCADE, de ruta mariñeira pola ría de Vigo coas mariscadoras de Arcade (I)

Trala iniciativa de Amegrove, Vilanova e Carril, na Ría de Arousa, maila experiencia das mariscadoras de Poio, Lourizán, Raxó e San Telmo na Ría de Pontevedra, tocoulles a vez ás mariscadoras de Arcade. Este xoves realizaron o primeiro ensaio da visita guiada de turismo mariñeiro deseñada por elas mesmas para dar coñecer o seu traballo na Ría de Vigo.

 

ALIADAS regresa á Ría de Pontevedra para impulsar o lanzamento da 'Guía de coidados da saúde para o benestar das mariscadoras'

O programa de formación e fomento do asociacionismo volveu acompañar as mulleres do Mar de Poio e da Ría de Pontevedra que ao longo dos últimos meses traballaron na identificación das principais doenzas que padecen as mulleres do mar. Agora están a piques de presentar un cartel que lles permitirá adquirir novas rutinas de prevención.

Saberes e Sabores na Costa Sostible: cociñamos con algas, berberechos e ameixas en conserva

Mariscadoras da Ría de Muros-Noia do programa EMBARCA asistiron a un obradoiro de cociña creativa e de produto impartido por Miguel Mosteiro. A súa experiencia como mariñeiro, antes que chef, valeulles ás mulleres da Costa Sostible para apreciar o xénero co que traballan a cotío non só como un bocado exquisito, senón tamén como recurso mariño de primeiro nivel.

Primeiro encontro de mulleres Candieira arredor do turismo mariñeiro

Mulleres do mar das zonas da Ría de Vigo-A Guarda, Ría de Pontevedra, Ría de Arousa e Costa da Morte participaron nunha xornada na que visitaron as instalacións do Instituto Galego de Formación en Acuicultura (Illa de Arousa) e a Asociación Cultural Guimatur, que dende hai máis dunha década desenvolve experiencias de turismo mariñeiro en Cambados.

O turismo mariñeiro guiará o primeiro grande encontro das mulleres de Candieira, a Rede de apoio e promoción ás mulleres do mar de Galicia

Preto dun cento de mulleres dos GALP Costa da Morte, Ría de Arousa, Ría de Pontevedra e Ría de Vigo-A Guarda xuntaranse este venres 8 de xuño na Illa de Arousa (Instituto Galego de Formación en Acuicultura) e Cambados (Guimatur) para desenvolver unha visita técnica orientada ao turismo mariñeiro no marco do programa EMBARCA de Candieira.

O marisqueo a pé, a acuicultura das bateas e os recursos específicos da Ría de Arousa nunha nova sesión de traballo do programa EMBARCA

O pavillón Fexdega de Vilagarcía de Arousa volveu reunir as mulleres do GALP Ría de Arousa nun encontro dedicado á construción dun relato que dea a coñecer o seu oficio como bateeiras, mariscadoras de a pé, de a flote e percebeiras.

Mulleres do mar da Costa Sostible e do Golfo Ártabro Norte traballan na elaboración de ameixa nunha nova sesión de Saberes e Sabores

Máis dunha trintena de mulleres, mariscadoras e emprendedoras participantes no proxecto EMBARCA, de Candieira, xuntáronse en Pontedeume para afondar na elaboración tradicional de produtos do mar e acrecentar as súas sinerxías na busca dunha maior gobernanza e empoderamento das mulleres do sector pesqueiro.

Mariscadoras e mulleres emprendedoras do Golfo Ártabro Norte e da Costa Sostible aprenden como se elabora unha conserva

Ataviadas cunha rede para o cabelo, bata protectora e cobertores plásticos nos pés, mulleres mariscadoras e emprendedoras participantes do proxecto Embarca, de Candieira, asistiron a unha clase práctica no CIFP Coroso. As asistentes puideron observar de primeira man como se elabora e transforma un produto do mar, neste caso o berberecho, ata acabar nunha lata.

Mulleres do mar e do rural da Costa Sostible e do Golfo Ártabro Norte traballan nun prototipo para transformar e conservar produtos do mar

Visitarán as instalacións do CIFP Coroso, onde se imparte un ciclo de Procesos e Calidade na Industria Alimentaria, para poñer en práctica dúas receitas, dentro do taller de Candieira “Saberes e sabores do mar e da horta”.

O programa ALIADAS de formación e impulso ao asociacionismo para mulleres do mar chega ao GALP Ría de Vigo-A Guarda

Tras a celebración das primeiras sesións de ALIADAS, programa de acompañamento de corte asociativo, nos territorios de varios dos Grupos de acción local pesqueira que forman parte de Candieira (Costa Sostible, Ría de Pontevedra, Golfo Ártabro Norte e Arousa), ALIADAS prosegue o seu camiño coas primeiras sesións en Arcade e Vilaboa.

Aberta a inscrición nos programas formativos e de asesoramento dirixidos a mulleres do mar que queiran emprender ou asociarse: EMBARCA e ALIADAS

O proxecto Candieira pón en marcha un dobre programa para mulleres do mar e emprendedoras que queiran iniciar proxectos empresariais ou asociativos: EMBARCA, programa de formación e asesoramento, e ALIADAS, programa de intercambio de coñecemento e impulso do asociacionismo.


Consulta as datas e inscríbete aquí

Taller de ideas en Miño o martes 26

A rede de apoio e promoción das mulleres do mar Candieira chega a Miño o martes 26 de setembro cun obradoiro de ideas dirixido ás traballadoras do sector pesqueiro e outros sectores que teñan relación co mar (turismo, hostelería, restauración), e tamén para interesadas en desenvolver iniciativas económicas ou asociativas. O obxectivo: favorecer o emprendemento, o empoderamento e a busca de sinerxías entre elas.

Taller en Vilanova de Arousa para mulleres do mar e emprendedoras

A rede de apoio e promoción das mulleres do mar Candieira desembarca este martes 19 de setembro en Vilanova de Arousa para ofrecer un obradoiro dirixido ás traballadoras do sector pesqueiro e outros sectores que teñan relación co mar (turismo, hostelería, restauración), e tamén para interesadas en desenvolver iniciativas económicas ou asociativas. O obxectivo: favorecer o emprendemento, o empoderamento e a busca de sinerxías entre elas.